قازاقستان مەن سلوۆەنيا حالىقارالىق ارەنادا ەكونوميكالىق ديپلوماتيا مەن ىنتىماقتاستىققا باسا نازار اۋدارا وتىرىپ, ساياسي تۇرعىداعى جان-جاقتى ىنتىماقتاستىق پەن ارىپتەستىكتى نىعايتۋعا نيەتتى. بۇگىن وتكەن قازاقستان-سلوۆەنيا ساياسي كونسۋلتاتسيالارىنىڭ باستى كۇن ءتارتىبى وسىنداي.
قازاقستاندىق دەلەگاتسيانى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو, سلوۆەنيا دەلەگاتسياسىن - سىرتقى ىستەر مينيسترلىگىنىڭ مەملەكەتتىك حاتشىسى اندرەي لوگار باسقاردى.
ديپلوماتتار ساياسي, ەكونوميكالىق جانە مادەني-گۋمانيتارلىق ءوزارا ارەكەتتەستىكتىڭ كەڭ اۋقىمىن ەگجەي-تەگجەيلى تالقىلاپ, ارىپتەستىكتى كەڭەيتۋگە دەگەن ءوزارا بەيىلدىلىگىن راستادى. سىرتقى ىستەر مينيسترلىكتەرى اراسىندا ەكونوميكالىق ديپلوماتيا اياسىنداعى ءوزارا ءىس-قيمىلدى جانداندىرۋ تۋرالى ۋاعدالاستىققا قول جەتكىزىلدى (2017 جىلى ەكىجاقتى ساۋدا اينالىمى 100 ملن. ەۋرودان استام قۇرادى). ر. ۆاسيلەنكو بۇگىن قر ءسىم الدىندا تۇرعان نەگىزگى مىندەتتەردىڭ ءبىرى قازاقستانعا ينۆەستيتسيالار مەن جاڭا تەحنولوگيالاردى تارتۋ بولىپ تابىلاتىنىن ايتتى.
وسىعان وراي, 2018 جىلعى 5-6 ماۋسىمدا استانادا وتكەن قازاقستان-سلوۆەنيا ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ ءتورتىنشى وتىرىسىنىڭ ناتيجەلەرىن, سونداي-اق ەكىجاقتى بيزنەس-فورۋم اياسىندا قول جەتكىزىلگەن ۋاعدالاستىقتاردى جوعارى باعالادى.
سونىمەن قاتار, ءوز سالالارىندا كوشباسشى بولىپ تابىلاتىن جانە بۇكىل الەمدە وكىلدىكتەرى بار سلوۆەنيا كومپانيالارىنىڭ – KRKA ء(دارى دارمەكتەر), Iskratel Group (IT شەشىمدەر), Gorenje (تۇرمىستىق تەحنيكا), Bisol Group (كۇن باتارەياسى) تابىستى جۇمىسى اتاپ ءوتىلدى. جالپى, قازاقستاندا 20-عا جۋىق سلوۆەنيا كومپانيالارى قىزمەت كورسەتەدى.
تاراپتار ىنتىماقتاستىقتىڭ IT (اقپاراتتىق تەحنولوگيالار), فارماتسەۆتيكا, كولىك ينفراقۇرىلىمى, لوگيستيكا, تۋريزم, ساۋىقتىرۋ مەديتسيناسى, جاسىل تەحنولوگيالار جانە باسقا دا سالالارىن پەرسپەكتيۆالى دەپ بەلگىلەدى.
ر. ۆاسيلەنكو سلوۆەنيالىق ارىپتەستەرىن قازاقستاندىق ەكونوميكاعا ينۆەستيتسيالاۋ مۇمكىندىكتەرى جانە قازاقستانداعى شەتەلدىك ينۆەستورلار ءۇشىن ارتىقشىلىقتار تۋرالى حاباردار ەتتى. وسىعان وراي, سلوۆەنيا تاراپىن «ەكسپو-2017» بازاسىنداعى جوبالار – «استانا» حالىقارالىق قارجى ورتالىعىن, IT-ستارتاپتار حالىقارالىق تەحنوپاركىن جانە «جاسىل» تەحنولوگيالار جانە «بولاشاق ەنەرگياسى» ينۆەستيتسيالىق جوبالارىن دامىتۋ ورتالىعىن ىسكە اسىرۋداعى بەلسەندى ىنتىماقتاستىققا شاقىردى.
سونداي-اق, تاراپتار ەۋرازياداعى ترانزيت-كولىكتىك الەۋەتتى دامىتۋ اياسىنداعى ءوزارا ءىس-قيمىلدى جانداندىرۋعا, ونىڭ ىشىندە «بەلدەۋ جانە جول» باستاماسىن جانە سلوۆەنيانىڭ كوپەر پورتىنىڭ مۇمكىندىكتەرىن پايدالانۋ ىسكە اسىرۋ ءوزارا ءىس-قيمىلدى جانداندىرۋعا دەگەن ورتاق ىنتالارىن راستادى.
كەلىسسوزدەر بارىسىندا قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قىزمەتى, سيريالىق رەتتەۋ جونىندەگى استانا پروتسەسى, ورتالىق ازيا, ەۋروپالىق وداق جانە بالقان ءوڭىرىنىڭ ەلدەرى اراسىنداعى ءوزارا ءىس-قيمىلدىڭ پەسرپەكتيۆا ماسەلەلەرى بويىنشا پىكىر الماسۋلار ورىن الدى. ر. ۆاسيلەنكو قازاقستان مەن ەۋرووداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىم اياسىندا قازاقستان ازاماتتارى ءۇشىن ۆيزالىق رەجيمدى جەڭىلدەتۋ بويىنشا كەلىسسوزدەر باستاۋ ماسەلەسى بويىنشا قولداۋ كورسەتكەنى ءۇشىن سلوۆەنيا تاراپىنا العىسىن ءبىلدىردى.
قازاقستاندىق ديپلومات سلوۆەنيادا بولعان كەزدە قازاقستاننىڭ ماريبور مەن نوۆو-گوريتسا قالالارىنداعى قۇرمەتتى كونسۋلدارى گورازد شيفرەر مەن ديميتري پيتسيگانىڭ قىزمەتىمەن تانىستى, سونداي-اق «Kazakh Invest» ۇك» اق-نىڭ ورتالىق جانە شىعىس ەۋروپاداعى تاۋەلسىز وكىلى بولىپ تابىلاتىن قازاقستان-سلوۆەنيا بيزنەس كلۋبىنىڭ پرەزيدەنتى دەيان شتانتسەرمەن سۇحبات وتكىزدى.
سونداي-اق, قازاقستاننىڭ سىرتقى ساياسي ۆەدومستۆوسى باسشىسىنىڭ ورىنباسارى ساپار بارىسىندا سلوۆەنيانىڭ پوۆير اۋىلىنداعى ازىرشە «كاسسە سەبەرو» رەتىندە بەلگىلى قازاقستاننىڭ قاھارمان-پارتيزانىنىڭ قابىرىنە گۇل قويدى. بۇگىنگى كۇنى, قر قۇزىرەتتى ورگاندارى 1943 جىلى قايتىس بولعان جاۋىنگەردىڭ جەكە باسىن انىقتاۋ بويىنشا جۇمىس جۇرگىزۋدە.